Ym mis Gorffennaf 2024, lansiodd Samariaid Cymru a’r elusen cefnogi ffermwyr Tir Dewi brosiect i fynd i’r afael â’r risg o hunanladdiad o fewn y gymuned ffermio.
Nod prosiect ‘Ein Ffermio, Ein Dyfodol’ yw adeiladu gwydnwch cymunedol drwy arfogi ffermwyr ifanc yn well i wneud gwahaniaeth i’w bywydau eu hunain, yn ogystal â nodi sut i ofalu amdanynt eu hunain a’r rhai o’u cwmpas, er mwyn sicrhau bod mwy o bobl yn cael y gefnogaeth sydd ei hangen arnynt ac, yn y pen draw, leihau’r risg o hunanladdiad.
Yn ogystal â darparu hyfforddiant i dros 100 o ffermwyr ifanc a myfyrwyr amaethyddol yng Nghymru, mae Samariaid yn gweithio’n agos gyda ffermwyr ifanc i sicrhau bod negeseuon ac adnoddau perthnasol yn cael eu creu a’u rhannu o fewn y gymuned.
Mae Clybiau Ffermwyr Ifanc Cymru hefyd yn cymryd rhan ac yn cefnogi Samariaid, sy’n cynnal amrywiaeth o weithgareddau gan gynnwys gweithdy ‘Gwrando’, sesiynau celf a gweminar, i godi ymwybyddiaeth ac i helpu pobl ifanc i deimlo’n fwy hyderus i siarad yn agored am eu profiadau, edrych allan am ei gilydd, dod yn wrandawyr gwell a cheisio cymorth.
Mae’r ffermwyr ifanc William Meadmore ac Elin Lewis yn cefnogi’r prosiect yn llawn ac yn teimlo’n angerddol am rymuso pobl ifanc i weithredu er mwyn helpu i leihau hunanladdiadau o fewn y gymuned ffermio.
“Mae’n rhaid i ni ddysgu dod yn wrandawyr gwell a gofalu am ein gilydd cystal ag yr ydym yn gofalu am ein hanifeiliaid a’n cnydau.”
Will Meadmore, Ffermwr ifanc
Mae Elin a William wedi rhannu eu negeseuon mewn dwy ffilm fer, sy’n cael eu gwylio gan aelodau CFfI a myfyrwyr, ac sy’n cael eu rhannu’n eang ar y cyfryngau cymdeithasol.
Drwy’r ddwy stori fideo, ein nod yw:
- Lleihau stigma drwy rannu straeon go iawn.
- Grymuso ffermwyr ifanc i rannu eu straeon a’u profiadau ac i siarad am bynciau anodd.
- Annog ymddygiad ceisio cymorth a chymorth gan gyfoedion, gan hyrwyddo gwrando gweithredol a chodi ymwybyddiaeth o’r risgiau a’r gefnogaeth sydd ar gael.
- Codi ymwybyddiaeth o’r prosiect a’r hyfforddiant ar gyfer ffermwyr ifanc.
Mae’r prosiect hwn yn cael ei gefnogi gan Ymddiriedolaeth NFU Mutual a Sefydliad Moondance.
Ffoniwch ein llinell gymorth rhadffôn: 0800 121 47 22
Mae tair ffordd y gallwch gysylltu â ni:
Ffoniwch ein llinell gymorth rhwng 7:00 a 22:00
Anfonwch e-bost atom
Cwblhewch ein ffurflen hunangyfeirio ar-lein.